खासदाराच्या मुलाने भरधाव कारने तरुणीला उडवलं; मुलीचा जागीच मृत्यू, तरीही अटक नाही, पोलीस म्हणतात ‘हा तर…’

माधापूरचे सहाय्यक पोलीस आयुक्त सी. श्रीधर यांनी सांगितलं आहे की, आरोपीला नोटीस बजावण्यात आली आहे. हा गुन्हा जामीनपात्र असून त्यात जास्तीत जास्त सात वर्षांपेक्षा कमी शिक्षेची तरतूद असल्याने आरोपीला अटक करण्यात आलेली नाही, असंही त्यांनी सांगितलं.

अपघात कसा घडला आणि त्यानंतर काय झाले?

एफआयआरनुसार (FIR), भारती आणि तिची सहकारी पूजा अशोक अलोणे या रविवारी दुपारी ३ च्या सुमारास जेवणासाठी जवळच असलेल्या ‘आयटीसी कोहिनूर’ (ITC Kohenur) परिसराकडे गेल्या होत्या. कामाच्या ठिकाणी परतत असताना, मॉलसमोरून रस्ता ओलांडण्याचा प्रयत्न करत असताना भारतीला ‘ॲस्टन मार्टिन’ (Aston Martin – TG-09-G-0666) या गाडीने धडक दिली.

या धडकेनंतर भारतीच्या डोक्याला गंभीर दुखापत झाली आणि तिला मोठ्या प्रमाणात रक्तस्राव झाला. पोलिसांनी दिलेल्या माहितीनुसार, तिला त्याच कारमधून जुबली हिल्स येथील अपोलो रुग्णालयात नेण्यात आले, जिथे तिला मृत घोषित करण्यात आले. त्यानंतर तिची मैत्रीण पूजाने स्टोअर मॅनेजर अश्विन कुमार यांना याची माहिती दिली आणि त्यांनी पोलिसांना कळवले.

एफआयआरमध्ये नमूद केल्यानुसार, भारतीला धडक दिली तेव्हा कार अतिशय वेगाने आणि निष्काळजीपणे चालवली जात होती. हा गुन्हा भारतीय न्याय संहितेच्या (BNS) कलम 106(1) अन्वये दाखल करण्यात आला आहे. हे कलम निष्काळजीपणाच्या किंवा बेपर्वाईच्या कृतीमुळे (जी सदोष मनुष्यवधाच्या श्रेणीत येत नाही) मृत्यू ओढवल्याशी संबंधित आहे.