देश
विरारमध्ये महिला पोलीस अधिकाऱ्यावर गोळीबार
- 55 Views
- March 08, 2020
- By admin
- in देश, समाचार
- 0 Comments
- Edit
दोनशे कोटी रुपयांच्या कॉर्पोरेट हॅकिंग प्रकरणाचा तपास करत असलेल्या पालघर गुन्हे अन्वेषण विभागातील सहाय्यक पोलीस निरीक्षक सिद्धवा जायभाये (वसई युनिट) यांच्यावर शनिवारी रात्री उशिरा मुंबई-अहमदाबाद महामार्गावर विरार फाटा येथे बाइकवरून आलेल्या हल्लेखोराने गोळीबार केल्याने खळबळ उडाली आहे. या हल्ल्यात जायभाये या सुदैवाने बचावल्या आहेत.
सिद्धवा जायभाये या रात्री आठ वाजताच्या सुमारास पालघर येथून नालासोपारा येथे आपल्या घरी जाण्यासाठी निघाल्या होत्या. दरम्यान, विरार फाटा येथे रात्री ९ वाजताच्या सुमारास त्यांच्यावर हल्ल्याचा प्रयत्न झाला. विरार फाटा येथे असलेल्या ‘बर्गर किंग’जवळ त्या थांबल्या होत्या. बर्गर किंगमधून पार्सल घेऊन बाहेर आल्या तेव्हाच चेहरा झाकलेल्या अज्ञात हल्लेखोराने त्यांच्यावर गोळी झाडली. गोळी जायभाये यांच्या कारच्या बोनेटला लागली. सुदैवान या हल्ल्यातून त्या बचावल्या. त्यांना कोणतीही इजा झाली नसून त्या सुखरूप असल्याचे सांगण्यात आले.
सिद्धवा जायभाये या स्वत:च्या कारने घराच्या दिशेने निघाल्या होत्या. त्यांच्यासोबत कारमध्ये दोन पोलीस सहकारीही होते. हल्लेखोर एक राउंड फायर करून पसार झाला. हल्लेखोर काळ्या रंगाच्या पल्सरवरून आला होता. त्याने अंगात जॅकेट घातले होते, असे सांगण्यात आले. या घटनेची माहिती मिळताच पोलीस तातडीने घटनास्थळी दाखल झाले असून संपूर्ण परिसरात शोधमोहीम राबवण्यात येत आहे. जिथे गोळीबार झाला त्या ठिकाणचे सीसीटीव्ही फुटेजही पोलीस तपासत आहेत. अद्याप हल्लेखोर हाती लागलेला नाही.
दरम्यान, २०० कोटी रुपयांच्या कार्पोरेट हॅकिंग प्रकरणाचा तपास जायभाये करत आहेत. याप्रकरणी सात जणांना अटक करण्यात आलेली आहे. बँक खात्यातून २०० कोटी रुपये चोरणाऱ्या बड्या रॅकेटचा जायभाये यांनी छडा लावला आहे. या प्रकरणाचा व या हल्ल्याचा काही संबंध आहे का, याचाही तपास केला जाणार आहे.
