देश
पंढरपूर सातारा रस्त्यावरील धोकादायक पूल कोसळला
- 58 Views
- February 12, 2020
- By admin
- in देश, समाचार
- 0 Comments
- Edit
तालुक्यातील सुपली या गावाजवळ पंढरपूर-सातारा राष्ट्रीय महामार्गावरील उजनी उजव्या कालव्यावरचा धोकादायक पूल अचानक कोसळला. स्थानिक तरुण सचिन माळी व काही जागृत रहिवाशांच्या सतर्कतेमुळे मोठा अनर्थ टळला असून कोणतीही जीवितहानी झाली नाही. या मार्गावरील वाहतूक पर्यायी रस्त्यावरुन वळवण्यात आली असून सदर पुलाच्या ठिकाणी पर्यायी मार्ग करण्याचे काम युद्धपातळीवर सुरू झाले आहे. रविवारी रात्री हा धोकादायक पूल कोसळला.
सुपली येथील उजनी उजव्या कालव्यावर १९९२ साली पूल बांधण्यात आला आहे. मागील दोन ते तीन वर्षांंपासून हा पूल धोकादायक बनला होता. सध्या उजनी कालव्याला पाणी सोडले आहे. त्यामुळे चार दिवसांपूर्वीच पुलाला असलेल्या एकमेव पिलरची एक भिंत खचली होती. ही बाब स्थानिक रहिवाशांनी बांधकाम विभागाच्या लक्षात आणून दिली होती. परंतु,अधिकाऱ्यांनी दुर्लक्ष केले आणि रविवारी रात्री १०.३० च्या सुमारास हा पूल कोसळला. रात्र असल्याने वाहतूक तुरळक होती त्यामुळे मोठी दुर्घटना टळली. पूल कोसळल्याचा मोठा आवाज झाल्यानंतर जवळचे रहिवासी सचिन माळी आणि देविदास माळी यांनी धाव घेतली. त्याच वेळी त्यांनी प्रसंगावधान राखून आरडाओरडा करीत दोन्हीही बाजूच्या वाहनांना थांबवले. त्यामुळे मोठी दुर्घटना टळली. घटनेनंतर पोलीस त्वरित घटनास्थळी पोहोचले.
या मार्गावरील वाहतूक बंद करून पर्यायी वेळापूर-साळमुख मार्गाने वाहतूक सुरू केली. पूल कोसळल्याने रात्री उशिरापर्यंत दोन्ही बाजूला वाहतूक कोंडी झाली होती. यावेळी उपरी व सुपली येथील तरुणांनी वाहतूक सुरळीत करण्यासाठी मोठी मदत केली. अचानक पूल कोसळल्याने सोलापूर, सातारा, महाबळेश्वनर या मार्गावरील वाहतूक ठप्प झाली आहे. प्रशासन व संबंधित ठेकेदार कंपनीच्या वतीने पडलेल्या पुलाचा मलबा हटवण्याचे काम युद्ध पातळीवर सुरू करण्यात आले असून पर्यायी मार्गही त्वरित सुरू करण्यात येणार आहे.
